(ភ្នំពេញ)៖ បើទោះបីជាចំណងអាពាហ៍ពិពាហ៍រវាងប្ដីប្រពន្ធអាចនឹងត្រូវបញ្ចប់ទៅដោយតថភាពណាមួយក៏ដោយ ប៉ុន្តែសាច់ឈាម និងតួនាទីជាឪពុកម្ដាយ គឺមិនអាចកាត់ផ្ដាច់បានឡើយ។ ជាក់ស្ដែង កាលពីពេលថ្មីៗនេះ មហាជននៅលើបណ្ដាញសង្គមបានសម្ដែងការរំភើប និងកោតសរសើរយ៉ាងខ្លាំងចំពោះទឹកចិត្តជាឪពុករបស់លោក ហេង គីមហៀង ដែលបានបង្ហាញនូវក្ដីស្រឡាញ់ដ៏ធំធេងចំពោះកូនៗ បើទោះបីជាបច្ចុប្បន្នលោកមិនបានរស់នៅក្បែរកូនៗផ្ទាល់ក៏ដោយ។

តាមរយៈការបង្ហោះនៅលើបណ្ដាញសង្គម លោក ហេង គីមហៀង បានបង្ហាញឱ្យឃើញថា លោកតែងតែតាមដានរាល់សកម្មភាព និងការលូតលាស់របស់កូនៗជានិច្ចមិនដែលដាច់។ អ្វីដែលធ្វើឱ្យលោក ក៏ដូចជាមហាជនរំភើបចិត្តបំផុតនោះ គឺការបានឃើញកូនប្រុសស្រីច្បង គឺ «ទែនៗ និង អូនយុ» ចេះយល់ដឹងពីទុក្ខធុរៈ ស្រឡាញ់ ថ្នាក់ថ្នម និងជួយមើលថែប្អូនៗតូចៗ (ជូអ៊ីង និង ជូអឺ) យ៉ាងកក់ក្ដៅបំផុត។
ភាពដឹងក្ដីរបស់កូនៗ បានក្លាយជាឱសថដ៏ទិព្វសម្រាប់ព្យាបាលបេះដូងរបស់អ្នកជាឪពុកដែលកំពុងនៅឆ្ងាយ។ យោងតាមរូបថតចំនួន ៣ សន្លឹកដែលលោកបានបង្ហោះ រួមជាមួយសារយ៉ាងខ្លីតែបង្កប់ដោយអត្ថន័យជ្រាលជ្រៅថា៖ «គួរឱ្យស្រឡាញ់ខ្លាំងណាស់! ❤️» បានស្ដែងឱ្យឃើញពីការនឹករលឹក និងមោទនភាពដែលលោកមានចំពោះកូនៗ។

សកម្មភាពនេះបានឆ្លុះបញ្ចាំងថា ទឹកចិត្តអាណិតស្រឡាញ់ និងការទទួលខុសត្រូវក្នុងនាមជាឪពុក គឺនៅតែដិតដាមជានិច្ចនៅក្នុងបេះដូងលោក ហេង គីមហៀង។ មហាជនជាច្រើនបានចូលមកបញ្ចេញមតិលើកទឹកចិត្ត និងសរសើរដល់ភាពឆ្លាតវៃ ដឹងក្ដីរបស់កូនៗលោក ដែលចេះស្រឡាញ់គ្នាបងប្អូន ទោះក្នុងកាលៈទេសៈណាក៏ដោយ។

គួរបញ្ជាក់ផងដែរថា រាល់សកម្មភាពនៃការមើលថែគ្នារបស់កូនៗលោក ហេង គីមហៀង តែងតែទទួលបានការចាប់អារម្មណ៍ខ្លាំងពីសំណាក់អ្នកលេងបណ្ដាញសង្គម ដោយសារតែភាពគួរឱ្យស្រឡាញ់ និងចំណងមិត្តភាពរវាងបងប្អូនរបស់ពួកគេទាំង ៤ នាក់៕