ភ្នំពេញ៖ ពិតជាគួរឱ្យក្តុកក្តួល និងអាសូរជាពន់ពេក ដែលថ្មីៗនេះ បងស្រីបង្កើតរបស់លោក ប៊ុង តុងធៀន បានចេញមុខបង្ហោះវីដេអូរៀបរាប់ទាំងក្តុកក្តួល និងអួលណែនដើមក ក្រោយពីទទួលរងនូវការរិះគន់ និងការចោទប្រកាន់យ៉ាងអយុត្តិធម៌ពីសំណាក់អ្នកលេងបណ្តាញសង្គមមួយចំនួន។

ពីការនឹករលឹក ក្លាយជាផ្ទាំងស៊ីបនៃការរិះគន់
មួយរយៈពេលចុងក្រោយនេះ បងស្រីរបស់លោក ប៊ុង តុងធៀន ដែលបច្ចុប្បន្នកំពុងតែមានផ្ទៃពោះផងនោះ តែងតែបង្ហោះរូបភាព ក៏ដូចជាវីដេអូខ្លីៗ បង្ហាញពីទំហំចិត្ត និងសេចក្តីនឹករលឹកយ៉ាងជ្រាលជ្រៅដែលគ្មានថ្ងៃបំភ្លេចបានចំពោះប្អូនប្រុស។ ទោះជាយ៉ាងណាក៏ដោយ បែរជាមានអ្នកលេងបណ្តាញសង្គមមួយចំនួនតូច ចូលទៅបញ្ចេញមតិដៀមដាម និងចោទប្រកាន់រូបនាងថា៖

«យកប្អូនប្រុសមកធ្វើជាសាច់រឿង (Drama) ដើម្បីទាញការចាប់អារម្មណ៍ សម្រាប់លក់ឡេ និងប្រម៉ូតកន្លែងអាជីវកម្ម» ទៅវិញ។

ការតបតទាំងទឹកភ្នែករបស់ស្ដ្រីជាបង
មិនអាចទ្រាំទ្រនឹងការចោទប្រកាន់ដ៏ប៉ះពាល់ដល់ផ្លូវចិត្តដ៏ធ្ងន់ធ្ងរនេះបាន បងស្រីលោក ប៊ុង តុងធៀន បានចេញវីដេអូបញ្ជាក់ទាំងទឹកភ្នែកហូរស្រក់ស្រស្រាក់ថា៖

«ការឈឺចាប់មួយនេះ គ្មានថ្ងៃភ្លេចបានទេ។ ហត់នឿយពេញទំហឹងហើយ! បងសុំទោសដែលមិនអាចធ្វើអ្វីដើម្បីប្អូន ការពារប្អូនបាន ក្រៅពីអង្គុយយំបែបនេះ…»

នៅក្នុងវីដេអូដដែលនោះ នាងក៏បានទទូចសុំចិត្តពីមហាជន និងអ្នកលេងបណ្តាញសង្គមទាំងអស់ ទាំងក្តីទន់ជ្រាយថា៖ «សុំចិត្តឈប់ប៉ះពាល់ និងឈប់និយាយដៀមដាមដល់ប្អូនប្រុសរបស់ខ្ញុំទៀតទៅ!»។

ក្រោយពីវីដេអូនេះត្រូវបានបង្ហោះភ្លាម មានមហាជន និងអ្នកគាំទ្រជាច្រើនបានចូលទៅសម្តែងការហួសចិត្តចំពោះអ្នករិះគន់ និងបានផ្តល់កម្លាំងចិត្តដល់បងស្រីរូបនេះយ៉ាងច្រើនកុះករ ដោយសុំឱ្យនាងរឹងមាំ និងកុំខ្វល់ខ្វាយពីសម្តីអគតិទាំងនោះ ដើម្បីថែរក្សាសុខភាពខ្លួនឯង ក៏ដូចជាកូនក្នុងផ្ទៃផងដែរ៕